仲有冇人記得呢隻杯?

今日到手了！

08 遊西藏 – 再見

去到旅程第16日，終於要離開西藏啟程返香港，賓館老闆幫我們預備好車輛接我們前往機場，拉薩貢嘎機場距離市區都有接近一小時車程。

貢嘎機場保安又係非常嚴密，所有車輛進入停車場前先要檢查，無機票證明o既唔俾你行近客運大樓，而進入客運大樓之前又要做一次安檢。而所謂離港安檢更加複雜，除鞋、電子儀器獨立過X-ray，基本上所有電池、電線都要再獨立過X-ray，與美國機場安檢睇齊，我個back pack足足過o左3次X-ray先俾我過。





今次又係坐A319(我無記錯原本應該坐A332)，國航seat pitch仲迫過深航，真係慘。



o係貢嘎機場起飛，原來係一個非常難忘o既飛行經驗。機場本身位於海拔大約4000米，而兩邊都係高山，飛機一爬升o既時候好快就到雲層，穿過薄薄o既雲層之後見到有座雪山山峰穿過雲層，當你讚嘆大自然o既偉大o既同時，前面又一座山峰同樣穿過雲層，迄立於你面前！





到達成都後，等大約四個小時再坐國航B757返深圳，成都機場設施同整潔度都幾好。之於隻B757就夠晒舊，耳筒仲係醫生聽筒型，降落深圳機場重要俾佢嚇一嚇，有o的重落地感覺。



o係皇崗過關，最憎係行人天橋o的樓梯，死拖爛拖後，返到香港了！

今次，好多謝兩位同伴—Kennis and Sarah、無機會o係佢間cafe玩o既Pazu、賓館老闆-徐強、型仔司機-達娃，thank you so much!!


西藏，我一定會再回來！

08 遊西藏 – 6/9 Bonus! 羊湖、日喀則(下)

日喀則係西藏自治區第二大城市，但去到比我o既感覺一o的都唔似身在西藏，如果唔係店舖外o既藏文，真係唔相信自己o係西藏，或者可能自己活動o個區問題…

晚飯完全無頭緒，o係大街上求其搵間川菜食，見入面都幾多人食緊，咁諗住難食極得去邊，點知中晒伏，薯仔排骨---凍o既，其餘小菜全部都係多油到死，真係難食到飛起！
之後去o左食Dicos，之前o個餐實在太差了，要搵o的正常小小o既食物填一填個肚，其實Dicos做得唔算差，西藏區內都叫食得過。

第二朝一早就參觀扎什倫布寺，去到o既時候大約8點幾，竟然未入得去參觀，跟住有位 “長老” 慢慢行出o黎賣票，仲鬧導遊小姐(估佢係導遊) ，o個一下情景覺得真係好型！
朝早o既扎什倫布寺無乜遊客，眼見絕大部份都係當地人來參拜，而且好多門都仲係鎖上，好似真係太早o黎參觀，不過都係一件好事，又可以靜靜地唔駛受其他遊客搔擾，參觀中途見到一班小僧侶o係到玩，仲俾佢o地拉埋落水...







扎什倫布寺o係半山有一條好長o既轉經輪路，但一路都唔知點樣上去，參觀完去返入口先搵到完全唔符合比例o既地圖，雖然有指示轉經輪路大約位置，但扎什倫布寺好大，睇完地圖都唔識搵路上。






返拉薩行另一條路，瀝青又係爛到不堪，司機大哥同我o地玩避地洞遊戲，而且沿路有成6個速度檢查站，跑慢一些，多點停車影相也可以。途途經過一個天葬台，如果唔係司機講我o地都唔知，因為o係山頂上面，只係見到有o的煙飄出o黎，而司機話按照藏民習俗，所有青年成年後只要體格健康o既藏民都要前往天葬台工作，有點似成人禮，其實俾佢o地了解死亡、輪迴o既意義…



沿路經過西藏o既大糧倉，日喀則主要以農業為主，所以公路兩邊好多都是田地，經濟發展聽司機講都唔錯。





o係差唔到多到達拉薩市郊之前，司機請我o地食溫室西瓜，皮薄，肉甜，好正！但好抱歉，因為皮太薄關係，無辦法帶返香港分享，唯有睇相啦~司機就買o左幾個返屋企俾佢仔仔食。



真係好多謝達娃帶住我o地週圍玩，不嫌其煩地經常停車俾我o地影相，朝早又遲起身，午飯又迫住同我o地食得清淡…我o地會準備一份小禮物寄俾你，真係多謝晒！

o係八廓街見到o既，好型:



o係拉薩最後一晚，先再去雪域餐廳晚飯，但質素俾之前食o既差o左，例如牛肉餃子唔係太熱，亦有好大陣清真味…飯後就o係賓館老闆大哥推介去歌舞廳睇表演，其實係公司、幹部洗阿公錢o既地方，逗留o左一個小時就返賓館執捨行李，明天就要離開西藏…



引申閱讀: 天葬

08 遊西藏 – 5/9Bonus! 羊湖、日喀則(上)

本來無預計會去日喀則，因為林芝旅程少o左一日，變相可以有時間去日喀則。

又見到達娃o勒，heehee，正！

先去羊湖，沿路o係拉薩市郊都見到好多樹葉已經變黃，西藏，慢慢踏入初秋了！







上去羊湖之路會經過180個手臂位，誇過海拔5030米o既崗巴拉山口；又一個超過5000米o既山口，初初對高海拔o既恐懼，去到旅程o既尾聲，已經無乜特別反應了(無論心理定身理都係)。
沿路風景又係靚到不得了，相機數碼化後好小聽到人再講 “謀殺菲林” ，而家只係會打爆卡，唔需要再謀殺，今次總共打爆接近兩張8GB卡，真係一流！

o係山口望落羊湖，真係好靚，雖然天氣一般，但雲層好低，一片片，好得意…





落山去到湖邊，更加感嘆大自然o既偉大，湖水好清晰，倒影好靚，去到o既時候光源唔係太好，太陽入o左少少鏡，但無礙美麗景色。雖然去唔到然烏湖，咁靚o既羊湖可以補數囉！







中午o係浪卡子鎮開飯，o係o個到食到我試過最好食o既清湯牛腩，牛腩肥瘦剛剛好，羅白鮮甜到不得了，但又係唔記得影相…唔好意思o勒！

食飽飯又上山前往卡若拉冰川，本應係更加壯觀，但應該由於全球暖化，冰川規模細o左好多，而且遊客眾多，污染其實都幾厲害。因為太多遊客了，影o左一陣就向江孜出發。



江孜最著名係白居寺，寺中有塔，塔中有寺！去到o既時候遊客好少，可以慢慢搵位影相同參觀。無數過十萬佛塔裡面係唔係真係有十萬個塔，但裡裡外外都係好宏偉。







參觀後又開車前往日喀則，中途司機o係一個小農莊停一停，參觀藏農生活，亦睇睇糟粑製作過程，藏民仲請我o地飲青稞酒，我自己就無飲，因為驚好易醉，同行兩位靚女就話好好飲。而藏民就推介我o地去夏魯寺參觀，同西藏一般見到o既寺廟有好大分別。





夏魯寺就o係由江孜前往日喀則o既半路，我o地就決定參觀，但發覺前往夏魯寺o既道路維修中，雖要走小路進入，呢條小路o係田野中穿過，一片金黃色o既青稞田! 先到夏魯寺參觀，回程先影相!!
去到夏魯寺o既時候差o的以為自己摸門釘，但好彩僧侶仲賣門票，而且亦將一o的已上鎖o既門打開俾我o地參觀，真係好多謝佢o地。夏魯寺感覺好有唐朝味道，特別係佢o既青瓦頂。



之後再出返去剛剛o個片青稞田，有一個感覺，就係自己置身o係法國o既稻田中，當時已經係黃昏六點幾了，但o個一片金黃仍然非常漂亮…

08 遊西藏 – 4/9聖湖納木錯

晨咁早六點就出發，天都未光，今次唔係坐四驅車，坐一架類似旅行車o既物體，租車費亦平一o的，初初o係拉薩市內都無乜o野，但一上青藏公路就知中伏，避震同懸掛完全唔掂…

拋下拋下，上斜仲無乜力水，差唔多成十點先爬到那根拉山口，海拔5190米，但真係無米拉山口咁壯觀，天氣又係多雲，真係黑仔。



落山向入口進發o既時候開始落雨，落落下變o左落雪，架車跑到門票檢查站停車等候o既時候落雪落得好大添！去到湖邊天氣慢慢好轉，起碼落雪無咁厲害，但真係好凍，加上空氣稀薄，行幾步都喘晒氣，好彩最後都有少少陽光，可以影到唔少相，仲騎埋牛牛。






之後返去當雄鎮開飯，沿路已經好好天，好天到有o的熱，真係可以一日四季，唔係講笑o既！







青藏公路沿線蓄牧業較多，當然亦有好多靚位影相啦!








今日旅程有段插曲，話說回程返拉薩o既時候，漢族司機同我o地講幫幫手去一個購物點(賣藏藥)坐一坐，飲啖茶，當時都覺得無問題，始終人o地都係搵兩餐。去到購物點坐o左陣就走，上車o個時司機竟然話唔符合要求要再去多間…都算，就同你去多間啦…
去完另一間上返車後又話唔得，仲o係電話同佢o的朋友鬧返我o地轉頭，初初仲想去多間，不過見我o地黑晒面先肯收手。TMD，你都算好o野o勒，仲要我跟你車去日喀則，你唔駛旨意！

返到酒店當然要求換車啦，一來架車拋得緊要，最重要係仲俾佢咁樣帶來帶去仲得了o既? 我o地要求搵返型仔司機，當然無問題啦，達娃，我o地又見面o勒!! 哈哈！

08 遊西藏 – 3/9重回拉薩

今日就要返去拉薩，一上車就發覺多o左個手袋，原來有位靚女坐順風車返拉薩~~

返拉薩前先去參觀卡定溝天佛瀑布，又係一般大陸o既旅遊景點，不過o係原始森林行o下又幾特別



沿路天氣都係密雲，真係悶死，不過總會搵到靚位停一停影相，亦俾司機大哥抽抽煙，就好似呢條吊橋咁…




再誇過米拉山口之前先食過午飯，其實呢幾日中午飯都係靠司機搵食，雖然好多時都係鎮仔開餐，但都幾企理，味道亦有意外驚喜，而我相信我o地位靚仔司機都幾咀刁。



車程間吹水知道位靚女o係拉薩讀大學，攻讀電腦系，學費一年大約$4000，加埋生活雜費其實都幾貴..

再次踏上米拉山口，今次雲層高，視野非常清晰，感覺亦較溫暖，景色更加美麗，亦遇上同一批藏民，又同佢o地影相…









沿路落山，雖然三日前都係行同一條路，但景色變得不一樣。駛經一條村莊o既時候見到一大班藏民跳舞慶祝收割節，而一班小朋友就跑來跑去，好熱鬧~







風景係好靚，特別路經一o的溪流地方，倒影真係靚到不得了!! 所以我每次落車影完相，上返車o既時候一定會多謝司機停車俾我o地影相。







四日三夜林芝之旅終於完成，真係好多謝形仔司機達娃大哥.. (前幾篇blog我打錯佢名，特此更正 :P )

是日晚飯於雪域餐廳，去林芝之前已經想試，但因為佢裝修小休幾天食唔到，返到拉薩第一件事就gogogo!
三個字形容: 平、靚、正！



聽日就向聖湖納木措出發！