在高原上飛車

由珠峰回日喀則，開車要大約六個小時，我們大約晚上六點才回程，本來打算去拉孜過一晚夜，但師傅大哥就提議今晚辛苦小小，一直開車回日喀則，因為拉孜只得一間酒店，貴得很！

但點都要食飯，因為身體o既糖份用得八八九九，我個頭赤赤痛，一入到飯館即刻隊o左罐百事可樂。今次旅程我已經數唔到飲o左幾多罐可樂，幾多支甜到死o既冰紅茶，同食o左幾多粒Panadol...

食飽飯，個身暖o左好多，亦開始我們四小時黑夜飛車旅程！



中途師傅大哥除o左播o下歌仔外，竟然播一套好舊o既港產片-《開心鬼》，o係四周黑麻麻環境下睇呢套o野真係幾好feel。

飛到中途，竟然落起大雨，路更難行，幸好呢段公路唔係山邊，亦鋪得幾靚，司機大哥亦開慢一點，有驚無險，凌晨一點回到日喀則。o係日喀則搵o左幾間酒店都無位，終於o係日喀則郵政酒店有標間，殺你！

回酒店房第一時間睇下部notebook著唔著到，ok...入到windows，拿拿臨過相叉電話訓覺。


第二朝九點半去酒店隔離食早餐，因為我要坐班車，都唔敢食得太飽，然後司機大哥就帶我坐日喀則<->拉薩班車...班車有私家車同中Van，私家車坐四個，中Van坐十四個，都係坐滿先開車，所以我等o左一粒鐘先坐滿我架中Van。

架中Van係Ford Transit，坐o左十四個人加N件行李，大部份都係藏民，佢o地都好友善(因為平.，RMB$60就去到拉薩)，而我件行李好唔好彩擺最底，我都有o的驚我部notebook頂唔順，因為沿路拋到飛起，又俾六、七箱o野壓住。足足拋o左四個鐘，最後人、機安全返回拉薩，ThinkPad果然係強！

返到吉雪，即刻叫o左碗蛋麵，肚餓o既時候特別好食，又去o左附近郵政局寄多一批postcard，然後就沖涼小休一陣，再去風轉hea...