2008/12/16

09終極目標 -- 搬!

死慳死抵,真係要09年內搬走!

無眼睇!

2008/12/13

旅遊.生活

安排緊來年假期的時候,總是覺得,越要襯自己有氣有力,去多一些比較艱辛的地方旅行...

當一個地方過度旅遊點化後,太商業化的地方好似變得同平日返工無大分別,自己覺得旅遊意義唔只係"使錢"、"買手信"、"為放假而放假",如果可以擴闊自己眼界,感受另一個民族精神,旅行,可以變得更有意義。

與其然只是一個過客,我想做一個"有得著"的過客。

2009旅遊目標:

由台北碌落台南,感受墾丁海岸生活;再飛上新疆,體驗少數民族每一樣東西。

2008/12/07

《海角七號》

今年台灣最火爆話題,除了阿扁、九哥外,應該就係《海角七號》了..

台灣本土火紅不無原因,老一輩對日治期間確實好有好感,故事亦圍繞這個話題發揮,而香港觀眾雖然投入感無台灣觀眾咁強烈,但當一套由人出發,集親情、愛情、攪笑小品,絕對值得入場支持。

無論主角、配角演出十分出色,配樂突出,雖然無台灣本土咁好成績,但香港票房成績總算有一個好交待。


香港電影仲停留o係三步曲:武打、警匪、做作商業廣告雜誌,香港電影人,你幾時先醒覺?老翻、BT...絕對唔係票房差的值口,港產片的沒落,是你們自己一手做成。

2008/12/05

留院記

今年好似同醫院結下不解之緣(啋!)...

前晚o係屋企食蒸排骨,咬到舊碎骨,仲吞埋落喉嚨,分幾鐘後就feel到好唔舒服,好似有o的銀住咁,雖然成餐飯都仲食到,但感覺係好唔舒服,無辦法下碌o左去仁濟睇A&E

分流做緊急,已經即時有醫生睇,醫生二話不說(對答唔超過5句)就叫我訓上床,噴麻醉劑,用插喉鉗夾硬撐大喉嚨睇下有冇骾骨,佢話搵唔到要照X ray...而我因為麻醉劑未發揮效用,痛到流眼淚..

照完X ray後,醫生聲稱有骨插到入去,但佢所指o既位置,同我覺得痛o既位置相距太遠,佢就叫我留院一晚,等聽朝外科醫生睇。
就o係等辦入院手續o既時候,醒起自己買o左份住院保險,即刻打俾agent,問完手續後,即刻簽紙過私家醫院睇。

去到私家醫院門診,醫生話我今晚好好彩,有耳鼻喉醫生on duty,可以即時用鼻腔內窺鏡睇下有冇骾到,不過安全起見都係先照X ray再確定(因為A&E o既X ray借唔到過去)。

o個位耳鼻喉醫生插喉檢查之前解釋得好詳細,每做一個程序都會有講解,檢查後真係無骾骨,只係擦傷o左,醫生就為安全起計就叫我留院一晚,亦方便我報保險。

入院o既時候已經係半夜,好安靜,亦俾我o係繁忙o既十一月休息一日...

第二朝中午醫生巡房檢查後,就碌返屋企再訓過,休息後夜晚睇《海角七號》...



2008/11/17

給自己的手信

一大一小,每一次翻閱,總會有愛不釋手的感覺!



大本精裝十月尾的時候已經送到我手,因為想俾一個小驚喜俾朋友,所以留到今日先o係blog到講。

一個機緣巧合下見到hypo廣邀Windows白老鼠出版大本精裝,眼見12平方印刷質素良好,就做了他們其中一隻白老鼠。同樣使用易明的web介面,drag and drop好容易就可以編排內容、樣式,而我們3個所謂"旅行家"也利用其中一頁寫了點點遊西藏後的感想...



到手的時候份量十足,滿分的質感,而hypo的印刷技術確實把握得很好,希望將來能夠帶給Windows的使用者更多優異產品!



旅行的時候好多時只記得買手信給親友,給自己的呢? 隨著印刷技術平民化,給自己的手信,現在可以自己親手做了!





至於你有沒有機會閱覽這世上這唯一的三冊,哈哈,就要看看你的緣份了!

2008/11/16

Moon Walkers 09!

第二年行Moon Walkers,今次真係好多好多人,四個鐘就行完由太子行去西貢呢大約20km路程.

今次行得比想中快,好似無上年咁辛苦,但落南圍左腳有少少抽筋。


下年再玩過!




2008/11/15

出o左尖沙咀都即刻搭車返屋企,好嬲!

2008/11/08

安靜了

在深夜的時候,聽著《安靜了》,有一種說不出口的心酸。

2008/10/18

遊西藏的回憶

自從Hypo 十二平方的出現,更容易將自己的美好回憶珍藏,今次西藏旅行更加要加倍珍藏起來,即使自己好想再遊西藏,但身體可否負擔仍是未知之數。



今次是第二次製作十二平方,收到包裹的一刻真的有點眼濕濕,終於到手了!







十分多謝Hypo,雖然製作及付款過程有些少阻滯,但仍然能趕於聚會前到達香港,分給兩位同遊西藏朋友。





我們三人正努力為西藏遊booky編輯,希望Hypo團隊一樣努力為booky除蟲蟲,盡早讓廣大使用者感受自己製作的photobooks到達手中那一份喜悅、那一份感動!

2008/10/10

西藏遊後‧話(1)

西藏有好多人覺得好神秘,遊西藏後我會覺得保存藏文化、環境來得更迫切,神秘只是一個旅遊催化劑。

夜晚o係酒店無聊睇電視,見到西藏電視台播放一o的歌頌自己政府功德o既節目,初初睇落都無乜特別,都係話自己點樣攪好基建,改善生活基本條件,但去到半路探訪一間小學,課室裡o既標語竟然搵唔到藏文字,即使拍攝到o既課本都係漢字教科書,再加埋受訪者接受訪問時表示好開心學到漢語…我唔評論訪問真實性,但我覺得小學裡無教授藏語就好驚奇,究竟政府係預計家庭會教小朋友藏語,定還是慢慢將藏語由西藏驅逐出去?真是天曉得!

西藏文化唔應該只保留o係博物館、宗教廟宇內,否則只會從歷史裡淡忘…

2008/09/30

仲有冇人記得呢隻杯?

今日到手了!

2008/09/24

08 遊西藏 – 再見

去到旅程第16日,終於要離開西藏啟程返香港,賓館老闆幫我們預備好車輛接我們前往機場,拉薩貢嘎機場距離市區都有接近一小時車程。

貢嘎機場保安又係非常嚴密,所有車輛進入停車場前先要檢查,無機票證明o既唔俾你行近客運大樓,而進入客運大樓之前又要做一次安檢。而所謂離港安檢更加複雜,除鞋、電子儀器獨立過X-ray,基本上所有電池、電線都要再獨立過X-ray,與美國機場安檢睇齊,我個back pack足足過o左3次X-ray先俾我過。





今次又係坐A319(我無記錯原本應該坐A332),國航seat pitch仲迫過深航,真係慘。



o係貢嘎機場起飛,原來係一個非常難忘o既飛行經驗。機場本身位於海拔大約4000米,而兩邊都係高山,飛機一爬升o既時候好快就到雲層,穿過薄薄o既雲層之後見到有座雪山山峰穿過雲層,當你讚嘆大自然o既偉大o既同時,前面又一座山峰同樣穿過雲層,迄立於你面前!





到達成都後,等大約四個小時再坐國航B757返深圳,成都機場設施同整潔度都幾好。之於隻B757就夠晒舊,耳筒仲係醫生聽筒型,降落深圳機場重要俾佢嚇一嚇,有o的重落地感覺。



o係皇崗過關,最憎係行人天橋o的樓梯,死拖爛拖後,返到香港了!

今次,好多謝兩位同伴—Kennis and Sarah、無機會o係佢間cafe玩o既Pazu、賓館老闆-徐強、型仔司機-達娃,thank you so much!!


西藏,我一定會再回來!

2008/09/23

08 遊西藏 – 6/9 Bonus! 羊湖、日喀則(下)

日喀則係西藏自治區第二大城市,但去到比我o既感覺一o的都唔似身在西藏,如果唔係店舖外o既藏文,真係唔相信自己o係西藏,或者可能自己活動o個區問題…

晚飯完全無頭緒,o係大街上求其搵間川菜食,見入面都幾多人食緊,咁諗住難食極得去邊,點知中晒伏,薯仔排骨---凍o既,其餘小菜全部都係多油到死,真係難食到飛起!
之後去o左食Dicos,之前o個餐實在太差了,要搵o的正常小小o既食物填一填個肚,其實Dicos做得唔算差,西藏區內都叫食得過。

第二朝一早就參觀扎什倫布寺,去到o既時候大約8點幾,竟然未入得去參觀,跟住有位 “長老” 慢慢行出o黎賣票,仲鬧導遊小姐(估佢係導遊) ,o個一下情景覺得真係好型!
朝早o既扎什倫布寺無乜遊客,眼見絕大部份都係當地人來參拜,而且好多門都仲係鎖上,好似真係太早o黎參觀,不過都係一件好事,又可以靜靜地唔駛受其他遊客搔擾,參觀中途見到一班小僧侶o係到玩,仲俾佢o地拉埋落水...







扎什倫布寺o係半山有一條好長o既轉經輪路,但一路都唔知點樣上去,參觀完去返入口先搵到完全唔符合比例o既地圖,雖然有指示轉經輪路大約位置,但扎什倫布寺好大,睇完地圖都唔識搵路上。






返拉薩行另一條路,瀝青又係爛到不堪,司機大哥同我o地玩避地洞遊戲,而且沿路有成6個速度檢查站,跑慢一些,多點停車影相也可以。途途經過一個天葬台,如果唔係司機講我o地都唔知,因為o係山頂上面,只係見到有o的煙飄出o黎,而司機話按照藏民習俗,所有青年成年後只要體格健康o既藏民都要前往天葬台工作,有點似成人禮,其實俾佢o地了解死亡、輪迴o既意義…



沿路經過西藏o既大糧倉,日喀則主要以農業為主,所以公路兩邊好多都是田地,經濟發展聽司機講都唔錯。





o係差唔到多到達拉薩市郊之前,司機請我o地食溫室西瓜,皮薄,肉甜,好正!但好抱歉,因為皮太薄關係,無辦法帶返香港分享,唯有睇相啦~司機就買o左幾個返屋企俾佢仔仔食。



真係好多謝達娃帶住我o地週圍玩,不嫌其煩地經常停車俾我o地影相,朝早又遲起身,午飯又迫住同我o地食得清淡…我o地會準備一份小禮物寄俾你,真係多謝晒!

o係八廓街見到o既,好型:



o係拉薩最後一晚,先再去雪域餐廳晚飯,但質素俾之前食o既差o左,例如牛肉餃子唔係太熱,亦有好大陣清真味…飯後就o係賓館老闆大哥推介去歌舞廳睇表演,其實係公司、幹部洗阿公錢o既地方,逗留o左一個小時就返賓館執捨行李,明天就要離開西藏…



引申閱讀: 天葬

2008/09/21

08 遊西藏 – 5/9Bonus! 羊湖、日喀則(上)

本來無預計會去日喀則,因為林芝旅程少o左一日,變相可以有時間去日喀則。

又見到達娃o勒,heehee,正!

先去羊湖,沿路o係拉薩市郊都見到好多樹葉已經變黃,西藏,慢慢踏入初秋了!







上去羊湖之路會經過180個手臂位,誇過海拔5030米o既崗巴拉山口;又一個超過5000米o既山口,初初對高海拔o既恐懼,去到旅程o既尾聲,已經無乜特別反應了(無論心理定身理都係)。
沿路風景又係靚到不得了,相機數碼化後好小聽到人再講 “謀殺菲林” ,而家只係會打爆卡,唔需要再謀殺,今次總共打爆接近兩張8GB卡,真係一流!

o係山口望落羊湖,真係好靚,雖然天氣一般,但雲層好低,一片片,好得意…





落山去到湖邊,更加感嘆大自然o既偉大,湖水好清晰,倒影好靚,去到o既時候光源唔係太好,太陽入o左少少鏡,但無礙美麗景色。雖然去唔到然烏湖,咁靚o既羊湖可以補數囉!







中午o係浪卡子鎮開飯,o係o個到食到我試過最好食o既清湯牛腩,牛腩肥瘦剛剛好,羅白鮮甜到不得了,但又係唔記得影相…唔好意思o勒!

食飽飯又上山前往卡若拉冰川,本應係更加壯觀,但應該由於全球暖化,冰川規模細o左好多,而且遊客眾多,污染其實都幾厲害。因為太多遊客了,影o左一陣就向江孜出發。



江孜最著名係白居寺,寺中有塔,塔中有寺!去到o既時候遊客好少,可以慢慢搵位影相同參觀。無數過十萬佛塔裡面係唔係真係有十萬個塔,但裡裡外外都係好宏偉。







參觀後又開車前往日喀則,中途司機o係一個小農莊停一停,參觀藏農生活,亦睇睇糟粑製作過程,藏民仲請我o地飲青稞酒,我自己就無飲,因為驚好易醉,同行兩位靚女就話好好飲。而藏民就推介我o地去夏魯寺參觀,同西藏一般見到o既寺廟有好大分別。





夏魯寺就o係由江孜前往日喀則o既半路,我o地就決定參觀,但發覺前往夏魯寺o既道路維修中,雖要走小路進入,呢條小路o係田野中穿過,一片金黃色o既青稞田! 先到夏魯寺參觀,回程先影相!!
去到夏魯寺o既時候差o的以為自己摸門釘,但好彩僧侶仲賣門票,而且亦將一o的已上鎖o既門打開俾我o地參觀,真係好多謝佢o地。夏魯寺感覺好有唐朝味道,特別係佢o既青瓦頂。



之後再出返去剛剛o個片青稞田,有一個感覺,就係自己置身o係法國o既稻田中,當時已經係黃昏六點幾了,但o個一片金黃仍然非常漂亮…