林芝地區被喻為西藏氧吧，除了因為平均海拔高度大約~3000米外，亦有大量原始森林，加上夏天帶來大量雨水，所以空氣含氧量非常高，十分適合遊客適應高原氣候。
先幾日找了旅館安排包車遊林芝，安排了一架4500cc o既四驅車同藏人司機帶住我o地玩5日，9點正準時出發!
呢位司機叫達圭，佢個樣真係好有style，好型仔，手車亦都好好，加上車輛本身性能唔錯，一路跑得好輕鬆。
大陸公路好鍾意於路經o既鄉鎮加設檢查站，除o左登記人員身份證外亦會發出一張行車時間記錄單，限制車輛不能早於某一個時間駛到下一個檢查站，確保安全，但很多時時間開得太慢，加上路面情況許可o既話，好多司機都會不知覺開快o左，當未夠時間過下一個檢查站o既時候唯一辦法就停埋一邊等~~我o地初初唔知有咁o既規例，o係架車上面呆等，後來學精了，如其呆等，不如中途多停一些影相，好過呆等。
通往林芝道路屬於318國道，318國道川藏段被喻為進藏線之中其中一條難走o既線路，因為地質複雜，經常山泥傾瀉，彎路多，上落斜道大，更有土路在其中(即沒有鋪設混凝土/瀝青o既爛路) 。行程上編排會走一段大約70多公里o既土路前往然烏湖，自己有少少擔心附近路面情況，因為一路往林芝路面情況都唔係太好，好多瀝青皮都凹凸不平，甚至被修路工人開了一個小坑後沒有填補就算，只擺放一塊小石頭提醒駕駛者，真係……
車輛越爬越高，前往林芝低地前需要誇過米拉山口--高度大約5000米，自己當然驚又出現有高原反應，真係好可怕，車輛一路行，其實有少少頭痛，但情況都可以接受。去到山口落車影相掛經幡，第一次於海拔高5000米o既大地腳踏實地，感覺空氣好凍之外，呼吸有少少喘，心跳當然加速，但我覺得係太興奮多過高原反應，因為真係好靚!!!
藍天、白雲、清純的白雪、五彩經幡，構成一幅好靚好靚o既圖畫！
o係當地人o既包圍下我o地三個人每人於山口掛上了經幡，為自己及身邊人祝福~亦借機會同當地人影相留念，臨走前佢o地不忘祝我o地一路平安。
車輛落山後，沿路係第二個世界，山上好多樹木，加上有雪山做背景，真係有o的去o左瑞士o既感覺，又係只可以用個靚字o黎形容。
食飽飯後繼續去林芝，但去林芝之前會前往一個旅遊景點--巴松措，國家4A級景點。中午後天色開始無咁好，去到巴松措落雨添，都無辦法啦！
巴松措湖水好清好綠，湖中有個島叫湖心島，傳說係空心的，整個島係浮出來~~
去到湖心島，雨越落越大，最後變成落雹，跑去其中一間寺廟避雨，竟然發覺個轉經輪好大，而且顏色好靚…落完雨後行返去停車場，竟然見到彩虹，仲要係兩條!
之後繼續開車往林芝，臨入林芝城區前經過一個檢查站，司機得到消息知道通往波密o既道路有大型塌坊，需要一個星期維修! 司機與旅行社聯繫後，認為明天可以先試試繼續往波密出發，再看路面情況決定後續行程。經過大約10小時車程終於到達賓館，比想象中豪，亦好企理。是日晚飯於林芝某中菜館，無論衛生、食物都完全不行!!!
沒有留言:
發佈留言